Globe, PLDT-Smart manginig na kayo! Bukod sa China at S. Korea, ang Japan at Taiwan telcos papasok din.

Pasok na rin ang Japan at Taiwan sa mga interesadong maging third party sa telecommunications industry ng Pilipinas para sa mas mabilis na internet service sa bansa.

Sinabi kahapon ni Presidential Communications Operations Office (PCOO) Secretary Martin Andanar na bukod sa China at South Korea ay nagpahayag din ng interes ang Japan at Taiwan na sumali sa third party telecom.

Bumisita aniya noong nakalipas na linggo sa bansa si Minister Seiko Noda ng Internal Affairs and Communications Ministry ng Japan at napag-usapan ang interes sa isyu ng third party.

“Oo at ito naman iyong KDDI. KDDI, iyan po iyong interesado na pumasok sa bidding at mayroon pang isa pa na interesado na Taiwanese firm pero hindi po binanggit sa atin ni Secretary (Eliseo Mijares) Rio kung ano po iyon,” ani Andanar.

Pero hindi lang aniya internet service ang bibilis sa pagpasok ng ibang telco sa bansa kundi madadagdagan din ang papasok na investments sa Pilipinas na mangangahulugan ng dagdag-kita at trabaho para sa mga Filipino.

“But what is important really is ‘yung bukod doon sa bibilis ‘yung speed ng internet at mababawasan o mawawala kaagad talaga ‘yung garble ay ‘yung additional funding or investment dito nga ho para sa bansa natin. Kasi ine-expect po nila Secretary Rio at ng DICT (Department of Information and Communications Technology) na ‘yung third player ay kailangan makapagpondo ng 300 to 400 billion pesos for the next five years,” ayon pa kay Andanar.

Kaugnay nito, si­na­bi ni Andanar na inaapura na ni Pa­ngulong Duterte ang DICT para masimulan na bago mag-second quarter ng taon para maging competitive ang telecom industry sa bansa.

Sinabi pa ng Kalihim na may magandang ibinunga ang desisyon ng Pangulo na buksan sa third player ang telecom industry dahil nagkusa na ang Globe at Smart na maglalabas ng mala­king pondo para pagandahin ang kanilang internet service.

“We can really see that even just the announcement itself ay nahikayat po iyong dalawang telco giants na mag-invest ng pera para pagandahin pa iyong kanilang serbisyo. So, that itself is already a victory for the Filipino people,” dagdag ni Andanar.