Kapalpakan ng Department of Health (DOH) 700,000 mag-aaral sa mga pampublikong paaralan ang nanganganib!
Nagpahayag ng kanilang pangamba ang mga magulang ng mga batang naturukan ng dengue vaccine at maging ang mga may edad na nakapagpabakuna matapos aminin ng French multinational pharmaceutical company na delikado at mapanganib sa kalusugan ang ginawa nilang gamot sa mga taong mababakunahan nito na hindi pa dinadapuan ng naturang sakit.
Kabilang ang 27-anyos na si Ana Vicencio ng Galas, Quezon City sa daan-daang tinurukan ng dengue vaccine sa Philippine Children’s Medical Center noong Setyembre 2017.
Dumaan pa umano siya sa screening para malaman kung physically fit bago bakunahan ng anti-dengue vaccine na Dengvaxia.
“Isinama ko nga ‘yung mga anak ko kasi nga libre pero ako lang ang nabakunahan dahil meron silang ubo at sipon. Mabuti na lang pala ay hindi sila umubra noon kundi pati sila ngayon ay kasama sa iniintindi ko,” ayon kay Vicencio.
Nabatid na marami rin ang nabakunahan sa Malabon, Navotas at Novaliches, Quezon City.
Iginiit nila na dapat gumawa ng paraan ang Department of Health para makontra ang isinaksak na bakuna sa mahigit 700,000 mag-aaral sa mga pampublikong paaralan.
“Naghihintay kami ng aksiyon sa DOH, dapat managot ang mga nasa likod ng dengue vaccine na iyan,” ayon naman kay Beth Bernardino ng Niugan, Malabon City.
Isa ang apo ni Bernardino sa mga nabakunahan noong Miyerkoles lamang, isang araw matapos ianunsiyo ng Sanofi Pasteur ang depekto sa kalusugan na maaring idulot ng produkto nilang gamot.
Ilang grupo ng mga nanay ang nagbabalak na sumugod sa DOH para komprontahin ang mga opisyal na nagbigay ng dengue vaccine sa mga mag-aaral sa mga pampublikong eskuwelahan.
“Ano ba ‘yang DOH na ‘yan bakit ngayon lang ninyo sinabi na masama pala ‘yung pinamimigay na anti-dengue kung kailan napa-injection-an ko na ‘yung apo ko,” ayon kay Aling Beth, taga-Malabon na hindi nagpabanggit ng apelyido.
Nangangamba umano siya ngayon na baka magkaroon ng malalang sakit ang kanyang apo dahil sa naturang bakuna.
“Panawagan po sa mga nanay na na-injection-an na ang anak nila sumugod tayo sa DOH, harapin natin sila,” pahayag pa ni Aling Beth.
Samantala, nakahanda umano ang DOH sa ‘worst-case scenario’ kaugnay ng babala ng Sanofi Pasteur na maaaring magdulot ng malalang dengue infection ang bakuna nila.
Sinabi ni DOH spokesman at Assistant Secretary Dr. Eric Tayag, noon pa mang magpasya sila na maging unang bansang gagamit ng Dengvaxia ang Pilipinas ay nakapagsagawa na rin sila ng mga kaukulang precautions o safety measures.
Aniya, naging maingat ang pamahalaan na ipatupad ang dengue vaccination program sa mga lugar kung saan maraming naitatalang kaso ng sakit na ito at ibinibigay lamang ito sa mga batang siyam na taong gulang pataas.
Tiniyak din ni Tayag na mino-monitor nila ang anumang posibleng hindi magandang epekto ng bakuna sa mga batang naturukan nito at hanggang sa kasalukuyan ay wala pa namang naiuulat na mas malalang impeksyon ng dengue sa mga batang nabigyan ng dengue vaccine.
Mga Komento
Mag-post ng isang Komento